Vedtekter for Stiftinga Rasmus Løland-markeringa 2007 – 2011
§ 1 Føremål
Stiftinga Rasmus Løland 2007 – 2011 er ei ideell stifting. Stiftinga skal arbeida for ei markering av livsverket til mennesket, forfattaren, journalisten og samfunnsbyggjaren Rasmus Løland. Arbeidet byggjer på ”Forprosjektrapporten for Lølandmarkeringa 2007 - 2011”.
Nynorsk er målform for stiftinga og for dei oppgåvene stiftinga står ansvarleg for.
§ 2 Grunnkapital
Stiftinga skal ha ein grunnkapital på minst kr 300 000
§ 3 Styret
Styret skal leia arbeidet, i samsvar med formålet til stiftinga. Styret skal føra tilsyn med forvaltninga av økonomi og ressursar og vera hovudansvarleg for å gjennomføra stiftingstiltaka.
Styret har frå 5 til 7 medlemer. Hovudstiftarane har rett til å peika ut eit medlem til styret kvar. Dei andre medlemene blir valde av stiftarane på stiftarmøta. Stiftarmøtet vel styreleiar og nestleiar mellom styremedlemene. Alle val gjeld for tre år om gongen.
Styret er vedtaksført når minst tre medlemer er til stades. Kvart medlem har ei røyst. Blir røystetalet likt, er røysta til styreleiar avgjerande.
Styret kan oppretta eit arbeidsutval på tre pesonar.
Styret kan gjera vedtak om at nye organisasjonar/institusjonar kan koma med i stiftinga.
§ 4 Rekneskap og revisjon
Suldal kommune stiller rekneskapskompetanse og revisjonstenester til disposisjon for stiftinga.
Styret vel revisor for stiftinga.
Styret har ansvar for at revidert årsrekneskap blir utarbeidd kvart år og at det blir sendt stiftarane innan 1. juni året etter.
§ 5 Stiftarmøte
Styret kallar inn til eit fast årleg møte mellom stiftarane, der arbeidet i stiftinga blir presentert og drøfta. Det skal haldast eit møte med stiftarane i samband med avviklinga av stiftinga våren 2012.
Revidert rekneskap og sluttrapport skal sendast til stiftarane, større økonomiske samarbeidspartnarar og Stiftingstilsynet innan 1. juli 2012.
§ 6 Vedtektsendringar
Styret kan endra vedtektene. Slike endringar skal leggjast fram for stiftarane til godkjenning, med to månaders frist for merknader.
§ 7 Nedlegging
Styret i Lølandmarkeringa 2007 – 2011 skal leggja ned stiftinga når prosjektet er gjennomført, likevel seinast 1. juli 2012.
