Forfattarbesøk i Skrivarhytta

Av Redaksjonen 20.jul.2009

- Det var fint å vera i skrivarhytta på Lindum, seier Kristi Furubotn. Ho er den første forfattaren som har nytta seg av tilbodet om gratis forfattaropphald.

I samband med Rasmus Løland sin 148. fødselsdag opna ei ny skrivarhytte på Lakseslottet Lindum i Suldal. Norske forfattarar kan søke om å få bu gratis i hytta nokre månader i året.

Kristi Furubotn frå Stavanger er den første forfattaren som har fått nytta seg av tilbodet. Furubotn er anestesisjukepleiar og forfattar. Ho har gjeve ut to romanar: Massevis kom i  2001 og Ingenting vart gitt ut i 2004. Denne våren gav Furubotn ut sakprosaen Tenk med hodet – anestesisykepleiere og anestesileger forteller – om narkoser og sånn.

Massevis er ein ungdomsroman som handlar om ungdom og livssyn. Sentralt i boka står tilhøvet til religion og religiøse miljø. Romanen byr på ei blanding av djupt eksistensielt alvor og humor.

- No skriv eg ein ny ungdomsroman, men eg vil ikkje røpa verken tittel eller innhald ennå.

- Eg skriv om det som interesserar meg. Eksistensielle spørsmål har alltid stått sentral. Då eg var ung tenkte eg mykje på forholdet til verda, åndelege ting og gutar. Ånd og kjøt, altså.

Kristi var ikkje stor då ho vart merksam på sin eigen talemåte. - Eg har alltid vore oppteken av dialektar. Far min jobba med vasskraft og me flytta mykje rundt på vestlandet.  - Eg brukar å seie at eg er eit kraftstasjonsbarn.

 – Eg var berre åtte år då eg sette i gang å konstruera min eigen dialekt. All flyttinga hadde gjort at eg hadde lagt meg til ein merkeleg blandingsdialekt, og eg skjemdest nesten over å høyra meg sjølv snakka.  I boka Massevis brukar eg interessa eg har for dialektar, og har fått gode tilbakemeldingar på skildringane.

Som barn budde Furubotn ei tid på Nesflaten i Suldal, så området er ikkje heilt ukjent for ho.
- Det føltes trygt å vera på Lindum og eg hadde fine naturopplevingar. Turar langs Lågen med dyreliv og markjordbær gav fin avveksling mellom skrive-øktene. Ein kveld såg eg ein stor rev utanfor hytta på Lindum. Den var stor og den luska ikkje. Nei, den hoppa, ler Furubotn.

  - Elles tykte eg det var godt å komma vekk frå den vanlege kvardagen, vera utilgjengeleg og kunne konsentrera meg om skrivinga, avsluttar Furubotn og legg til at ho satsar på eit nytt opphald på Lindum i august.

Les meir om skrivarhytta

Foto: Emile Ashley, Ashley studio




Fleire Nyhende